Deputeti i Partisë Demokratike të Kosovës (PDK), Përparim Gruda, ka reaguar ndaj shqetësimeve rreth mundësisë së shfuqizimit të projektligjit për Dhomat e Specializuara nga instancat në Hagë. Ai ka siguruar opinionin publik se ndryshimet e propozuara në ligj kufizojnë shprehimisht juridiksionin e Dhomës së Specializuar të Gjykatës Kushtetuese.
Sipas Grudës, duke u mbështetur në Amendamentin nr. 24 të Kushtetutës, ushtrimi i juridiksionit nga kjo Dhomë është i lidhur ngushtë me ligjin e veçantë. Në këtë kontekst, neni 23 i projektligjit të propozuar përcakton se Dhoma në Hagë ka kompetencë vetëm për referimet që burojnë nga vendimet, urdhrat ose aktgjykimet e Dhomave të Specializuara dhe Zyrës së Prokurorit të Specializuar.
Projektligji përjashton çdo mundësi që kjo Dhomë të ushtrojë kontroll abstrakt, konkret ose incidental të kushtetutshmërisë së ligjeve, përfshirë Ligjin Nr. 05/L-053. Gruda nënvizoi se ky kontroll mbetet kompetencë e Gjykatës Kushtetuese të Republikës së Kosovës në përbërjen e saj të rregullt në Prishtinë, konform nenit 113 të Kushtetutës. Ai sqaroi se Dhoma në Hagë nuk përbën një gjykatë të veçantë, por një organ me juridiksion të posaçëm.