Deputeti i Partisë Demokratike të Kosovës, Përparim Gruda, në emisionin “DPT te Fidani” të Klan Kosova, foli për situatën politike aktuale në Kosovë, me theks zgjedhjen e Presidentit të ri.
Ai deklaroi se Vetëvendosja ka rënë pre e standardit të vet të ndërtuar.
“Unë mendoj që ajo që ka ndodhur është se Vetëvendosja ka rënë pre e një standardi që e ka ndërtuar vet, standardi të mbrapsht, me u tallë me proceset politike dhe mos me marrë seriozisht asnjë proces, në këtë rast procesin e dialogut politik për ta zgjedhur Presidentin e ri”, tha Gruda.
Duke folur për Vetëvendosjen, deputeti i PDK-së u shpreh se kjo parti ka menduar se opozita është e dërmuar nga rezultati i zgjedhjeve dhe do ta votojë çdo kandidat të propozuar.
“Këta kanë shprehur që opozita është e dërmuar nga rezultati i zgjedhjeve, nuk reziston aspak dhe këdo që e qesin e votojnë, përfshirë edhe Glauk Konjufcën, por nuk ka dalë ashtu”, shtoi ai.