Trajneri i Manchester City, Pep Guardiola, deklaroi se skuadra e tij do të jetë në pozicion të pafavorshëm përballë Real Madrid në Ligën e Kampionëve për shkak të orarit të ngjeshur.
Ndeshja e FA Cup kundër Newcastle United është caktuar për të shtunën në orën 21:00, ndërsa City do të udhëtojë drejt stadionit Santiago Bernabéu të mërkurën, më 11 mars. Kjo lë vetëm 94 orë mes dy sfidave, situatë që ka zhgënjyer trajnerin spanjoll.
“Newcastle në orën 21:00 të mbrëmjes. Faleminderit shumë për atë kohë që na dhatë, në mënyrë që të shkojmë në Madrid me më pak kohë për t’u rikuperuar”, tha Guardiola me ironi. Ai shpjegoi se kthimi në Manchester në orën 1 ose 2 të mëngjesit pengon rikuperimin, ndryshe nga ora 7 ose 8 e mbrëmjes.
“E di që të gjitha ekipet në Kupën FA luajnë në orën 3 të pasdites. Në rregull, ne luajmë në orën 8 të mbrëmjes. Lodhja, e dini, detajet bëjnë diferencën, si goditjet nga këndi, goditjet e lira apo rivëniet anësore. Këto lloj detajesh vendosin ndeshje të mëdha”, shtoi ai.
City do të luajë së shpejti kundër Nottingham Forest në Premier League të mërkurën e ardhshme, pas fitores minimale ndaj Leeds United. Skuadra mbetet gjallë në katër kompeticione. Guardiola theksoi se faza vendimtare kërkon mentalitet të fortë dhe fokus në çdo ndeshje.
Ai përmendi rikthimin e Jérémy Doku, ndërsa Erling Haaland pritet të jetë gati së shpejti.