Pep Guardiola, trajneri i Manchester City-t, ka vlerësuar vendimin e José Mourinho-s, trajner i Benficës, për ta dërguar portierin Anatoliy Trubin në zonën kundërshtare në minutat e fundit të ndeshjes kundër Real Madridit. Ky gol i katërt siguroi fitoren 4-2 të Benficës, duke nxjerrë Realin jashtë tetëshes së parë dhe duke mundësuar kualifikimin direkt të City-t në fazën 1/8 të Champions League.
Guardiola deklaroi në konferencën për shtyp pas fitores së City-t ndaj Galatasaray-it se stafi i tij kishte ndjekur minutat e fundit të ndeshjes së Benficës nga dhomat e zhveshjes. “Pamë minutat e fundit të ndeshjes, ishim të gjithë aty, por nuk e dinim që Benficës i duhej një gol për t’u kualifikuar. Kur pamë José-n duke e dërguar portierin përpara, të gjithë u habitëm pse po e bënte, sepse Real Madrid mund të barazonte dhe ne do të dilnim jashtë tetëshes së parë”, tha ai.
Ai pranoi se strategjia ishte e zgjuar dhe e guximshme: “Ishte një strategji e mirë nga José për të shënuar atë golin e katërt”. Guardiola shtoi se do ta falënderojë personalisht Mourinho-n për këtë “ndihmë”, pavarësisht rivalitetit të mëparshëm midis tyre.
Sa i përket formatit të ri të Champions League, Guardiola shprehu mendime të ndara. “Nuk më pëlqen që ka më shumë ndeshje, por më pëlqen ideja e kampionatit. Është pozitive që çdo ndeshje është si një finale, qoftë në shtëpi apo në transfertë. Shikoni sa skuadra të forta kanë mbetur jashtë 24 vendeve të para dhe sa nuk janë në tetëshen e parë, kjo tregon sa i vështirë është ky turne”, deklaroi ai.
Për fazën 1/8, Guardiola u shpreh i kënaqur: “Jam shumë i kënaqur sepse kemi javë të gjata me më pak ndeshje, dhe na duhen. Tani e rëndësishme është të shkojmë në 1/8-at në gjendjen më të mirë të mundshme”. Benfica u kualifikua në vendin e 24-të, pozita e fundit për kalim direkt.