Manchester City barazoi 2-2 me Nottingham Forest në ndeshjen e zhvilluar në Etihad Stadium. Skuadra e drejtuar nga Pep Guardiola kaloi dy herë në avantazh, por miqtë barazuan në të dy rastet, duke ia mohuar Cityt dy pikë të rëndësishme në garën për titullin e Premier League.
Pas ndeshjes, Guardiola u shpreh i shqetësuar për pikët e humbura, por mbeti optimist. "Kanë mbetur nëntë ndeshje për t’u luajtur, tetë për Arsenalin. Ndeshja tjetër është kundër Newcastle. Gjithmonë jam i përqendruar te ndeshja tjetër", deklaroi ai.
Trajneri spanjoll e analizoi performancën si të mirë në shumë aspekte. "E analizoj ndeshjen dhe mendoj se ishte një performancë e mirë në shumë aspekte. Ka gjëra për të përmirësuar. Por në përgjithësi, ishte shumë mirë", tha Guardiola. Ai vuri në dukje se skuadra luajti 90 minuta të mira, me vrull, por ndonjëherë tranzicionet nuk u ekzekutuan siç duhej.
Kundër një skuadre mbrojtëse si Nottingham Forest, City krijoi raste, por mund të kishte gjetur më shumë Erling Haalandin dhe vrapimet e tij. "Ndoshta mund ta kishim gjetur më shumë Haalandin dhe vrapimet e tij fantastike", shtoi trajneri.
Guardiola shmangu komentet e gjata për episodet e diskutueshme, si penalltinë e mundshme ndaj Haalandit. "Gjithmonë mendoj se duhet t’i bëjmë gjërat shumë më mirë, në mënyrë që të mos varet gjithçka nga vendimet e gjyqtarëve", përfundoi ai. Pas këtij barazimi, Manchester City mbetet 7 pikë prapa liderit Arsenal, ndonëse ka një ndeshje më pak.