Pep Guardiola, trajneri i Manchester Cityt, pranoi hapur se Manchester United ishte skuadra më e mirë në ndeshjen e fituar 2-0 nga ky i fundit në derbin e qytetit të Mançesterit.
Pas ndeshjes, në prononcim për Sky Sports, Guardiola tha: "Skuadra më e mirë fitoi. Ata ishin më të mirë. Kur një ekip është më i mirë, duhet ta pranosh. Ata kishin energjinë që ne nuk e kishin, kështu që urime për ta".
Ai theksoi mungesën e kontrollit në lojë dhe gabimet defensive: "Ata krijuan raste në fund dhe natyrisht golat që pësuam ishin shumë të dobët. Nuk e kontrolluam lojën... Ata e nisën shumë fort, ne humbëm një ose dy topa".
Guardiola vuri në dukje se skuadra e tij nuk arriti të rrezikonte: "Ne nuk arritëm as të rrezikonim, as të dërgonim krosime apo të bënim lëvizje për ta fituar ndeshjen. Kjo lidhet edhe me energjinë – fitorja apo humbja varet nga ajo që bëjmë me topin, jo vetëm pa të".
Sa i përket incidentit ku Diogo Dalot i Manchester United-it i shpëtoi kartonit të kuq, Guardiola refuzoi të ankohej: "Mund ta thuash edhe këtë... Por nuk është kova arsyeja për të fituar apo humbur një ndeshje. Për të fituar duhet të bësh më mirë dhe ne sot nuk e bëmë".
Pas kësaj humbjeje, Manchester City mbetet gjashtë pikë prapa liderit Arsenal në garën për titullin e Premier League, ndërsa londinezët kanë një ndeshje më pak të zhvilluar.