Hysni Gucati, kryetar i Organizatës së Veteranëve të Luftës së UÇK-së, deklaroi se nuk beson që ish-krerët e UÇK-së do të dënohen nga Gjykata Speciale. Sipas tij, një vendim i tillë mund të sjellë destabilizim në Kosovë dhe në Ballkan.
Deklaratat u bënë pas një takimi me prefektin e Tiranës. Gucati tha se ndaj ish-udhëheqësve të UÇK-së nuk ka bazë materiale për dënim dhe se përgjegjësia për krimet gjatë luftës bie mbi forcat serbe.
"Nuk ka bazë materiale dënimi i tyre. 10 milionë shqiptarë, unë jam i bindur që Evropa nuk dëshiron të ketë trazira në Ballkan, sidomos në këtë vend, nëse dënohen", u shpreh ai. Gucati mohoi se UÇK-ja ka kryer krime ose spastrim ndaj qytetarëve në Kosovë dhe kërkoi që përgjegjësit serbë të dalin para drejtësisë.
Ai përmendi 13 mijë e 500 qytetarë të vrarë dhe 1 mijë e 324 fëmijë të vrarë nga ushtria, policia dhe paramilitarët serbë në periudhën 1998-1999. "Ne s’kemi qenë xhelatë, ne s’kemi spastru Kosovën nga asnjë qytetar. Çdo qytetar i Kosovës ka të drejtë të jetojë, të punojë, të veprojë këtu", tha Gucati.
Ai shtoi se një vendim dënues mund të pasohet me protesta ose demonstrata dhe mund të destabilizojë vendin dhe Ballkanin, por theksoi se deklaratat e tij nuk janë kërcënim. "Kjo është frika, jo që ne po bëjmë kërcënim", u shpreh ai.