Shkëlqim Hajdari, prefekti i Tiranës, deklaroi se ish-krerët e Ushtrisë Çlirimtare të Kosovës mbahen padrejtësisht në Hagë, pasi ndaj tyre nuk ka prova bindëse për akuzat e ngritura nga Prokuroria Speciale. Kjo deklaratë u bë të mërkurën në një takim në Organizatën e Veteranëve të Luftës së UÇK-së.
Hajdari tha se Hashim Thaçi dhe tre shokët e tij, drejtues të lartë të UÇK-së, janë në burg për gjashtë vjet në një proces gjyqësor pa elemente të drejtësisë evropiane. «Tashmë është e qartësuar për të gjithë opinionin publik shqiptar, por edhe ndërkombëtar, qoftë ky evropian, qoftë Shtetet e Bashkuara të Amerikës, kudo në botë, njerëz që duan të marrin vesh të vërtetën, që presidenti Hashim Thaçi dhe tre shokët e tij janë pjesë e një kombinacioni të ndyrë që s’ka asnjë element të drejtësisë evropiane, që s’ka prova bindëse për të vërtetuar asnjë nga akuzat e rënda», u shpreh ai.
Sipas prefektit, qëndresa stoike e të akuzuarve ka treguar mungesën e provave. Ai përmendi se dëshmitarët e paraqitur nga mbrojtja kanë kredibilitet të lartë ndërkombëtar. Gjithashtu, theksoi aktivitetin e vazhdueshëm të organizatave të veteranëve, shoqatave patriotike dhe kulturore në Kosovë, Shqipëri, Maqedoni, Preshevë dhe Malësi, me mitingje në qytetet kryesore.
«Ne shpresojmë te drejtësia e tyre. E pret një komb i tërë. Nuk e pret vetëm Kosova, po e pret Shqipëria, Maqedonia, shqiptarët që janë në Evropë, shqiptarët që janë në Amerikë. Dhjetë milionë shqiptarë presin drejtësi për çlirimtarët. Kurrë nuk mund të ndodhë të barazohet viktima me agresorin», deklaroi Hajdari.