Qytetarët në Prishtinë kanë kërkuar lirimin e ish-krerëve të Ushtrisë Çlirimtare të Kosovës (UÇK), Hashim Thaçi, Kadri Veseli, Jakup Krasniqi dhe Rexhep Selimi, të cilët po gjykohen në Dhomat e Specializuara të Kosovës në Hagë.
Ky reagim erdhi pas përfundimit të procesit gjyqësor më 18 shkurt 2026. Sipas tyre, akuzat janë të pabazuara dhe procesi përbën padrejtësi ndaj luftës së UÇK-së.
Reagimet e qytetarëve
Qytetari Bajram Kastrati deklaroi se dënimi i krerëve të UÇK-së do të nënkuptonte dënimin e të gjithë ushtrisë dhe të Kosovës. Ai u shpreh: «Me u dënuar krerët e UÇK-së, dënohet krejt ushtria, krejt Kosova. Prandaj është mu habit. Po ne shpresojmë që në muajin maj me qenë ata këtu. Se janë të pafajshëm. Merr mendja aq anomali e madhe, thotë prokurori Hashim Thaçi i ka mashtruar Clark-in. Kjo është mizerie. Nuk kanë faj ata».
Qytetari Bedri Berisha kërkoi lirimin e menjëhershëm të të gjithë të akuzuarve: «Ata duhet me u liruar menjëherë. Po të gjithë, të gjithë. Absolutisht».
Përfundimi i procesit gjyqësor
Më 18 shkurt 2026, mbrojtjet e të akuzuarve paraqitën argumentet e fundit. Ato përsëritën se Prokuroria nuk ka dëshmi për akuzat e ngritura dhe nuk ka arritur të provojë fajësinë e tyre, prandaj kërkuan aktgjykim shfajësues.
Mbrojtja e viktimave deklaroi se nuk ka detyrimin të vërtetojë akuzat ndaj të akuzuarve.
Në fund, të akuzuarit u shprehën përfundimisht rreth akuzave, duke ngulur këmbë se ndihen të pafajshëm.