Zëdhënësi i Hamasit, Hazem Qassem, deklaroi për Agence France-Presse se lëvizja islamiste palestineze është e hapur ndaj forcave ndërkombëtare paqeruajtëse në Rripin e Gazës, por hodhi poshtë ato që i përshkroi si ndërhyrje në “punët e brendshme” të territorit.
“Qëndrimi ynë për forcat ndërkombëtare është i qartë: ne duam forca paqeruajtëse që të monitorojnë armëpushimin, të garantojnë zbatimin e tij dhe të shërbejnë si neutralizues midis ushtrisë pushtuese dhe popullit tonë në Rripin e Gazës, pa ndërhyrë në punët e brendshme të Gazës.”, u shpreh ai.
Deklarata u bë e njohur më 21 shkurt 2026, pas takimit të parë të Bordit të Paqes në Washington. Anëtarët e këtij bordi u zotuan të sigurojnë miliarda dollarë për rindërtimin e Gazës, ndërsa disa prej tyre, si Kosova dhe Shqipëria, do të dërgojnë trupa si pjesë e një force stabilizuese.
Bordi i Paqes është një nismë e shpallur nga Presidenti amerikan Donald Trump, i cili është shpallur kryetar i saj. Kjo strukturë prezantohet si mekanizëm ndërkombëtar për koordinimin e përpjekjeve të stabilizimit dhe rindërtimit në Gaza, veçanërisht pas luftës dhe marrëveshjes së armëpushimit mes Izraelit dhe Hamasit.
Shpallja e Trump-it si kryetar nënkupton se ai do të vazhdojë ta kontrollojë këtë organizatë edhe pas largimit nga detyra presidenciale.
Përditësime
Pesë vende kanë zotuar trupa për forcën stabilizuese në Gaza: Indonezia, Maroku, Kazakistani, Shqipëria dhe Kosova.
Egjipti dhe Jordania mbështesin forcën duke trajnuar oficerë palestinezë.
Komandant i forcës është gjenerali amerikan Jasper Jeffers, me zëvendëskomandant nga Indonezia.
Forca mund të arrijë deri në 20 mijë anëtarë.