Lewis Hamilton, piloti 41-vjeçar britanik, po kryen ndryshime të rëndësishme në ekipin personal në Ferrari para Botërorit 2026 të Formula 1.
Në sezonin e parë me skuderinë italiane, Hamilton nuk arriti të ngjitej në podium, u mund nga shoku i skuadrës Charles Leclerc dhe regjistroi vetëm një fitore në garën Sprint të Kinës. Ky sezon pritet të jetë vendimtar, veçanërisht për shkak të ndryshimeve në rregulloren e garës.
Hamilton ka vendosur të ndahet nga inxhinieri i pistës Riccardo Adami. Gjatë testeve në Barcelonë, ai punoi me Bryan Bozzi, inxhinierin që zakonisht bashkëpunon me Leclerc. Ferrari ka afruar ish-inxhinierin e McLaren, Cedric Michel-Grozho, si partner teknik të Hamilton për vitin 2026.
Ndryshimet shtrihen edhe jashtë pistës. Hamilton është pranë ndarjes nga përgjegjësja e shtypit Gabriela Kuaku Jeboah (e njohur si Ela) dhe ka mbyllur bashkëpunimin me menaxherin Mark Hynes, i cili ka marrë një rol të ri te Cadillac. Të gjithë këta ishin pjesë e rrethit të ngushtë të pilotit me 105 fitore në karrierë.
I vetmi bashkëpunëtor që mbetet është fizioterapistja Angela Cullen. Synimi i këtyre lëvizjeve është të paraqesë Hamilton në formën më të mirë në timonin e SF-26.
Pas testeve në Barcelonë, Hamilton deklaroi: "Në fabrikë është bërë një punë e shkëlqyer për t’u siguruar që makina të jetë vërtet e besueshme. Vitin e kaluar nisëm testet shumë më keq. Tani dukemi në një gjendje më të mirë. Kam shumë shpresë se do të vazhdojmë kështu."