Kryetari i Partisë Demokratike të Kosovës (PDK), Bedri Hamza, zhvilloi një deklaratë për mediat pas mbledhjes së Kryesisë së partisë, ku trajtoi çështjen e ish-krerëve të Ushtrisë Çlirimtare të Kosovës (UÇK) dhe zhvillimet e fundit politike. Lidhur me rastin gjyqësor, Hamza u shpreh se partia që ai drejton pret një vendimmarrje profesionale dhe të drejtë nga Gjykata e Apelit.
“Ne po presim që mos të ketë nevojë për rigjykim fare. Apeli të vendosë drejt për rastin mbi bazën e fakteve, provave dhe drejtësisë. Ne po kërkojmë drejtësi”, theksoi Hamza. Ai shtoi se beson tek integriteti dhe profesionalizmi i gjyqtarëve, të cilët duhet ta bazojnë vendimin e tyre ekskluzivisht mbi faktet e paraqitura. Duhet theksuar se ish-krerët e UÇK-së janë dënuar me 81 vite burgim nga shkalla e parë e Gjykatës Speciale në Hagë.
Gjatë këtij takimi, Hamza iu përgjigj gjithashtu pyetjeve të gazetarëve lidhur me mundësinë e tërheqjes së lëndës në Gjykatën Kushtetuese, e cila ndërlidhet me procesin e konstituimit të Kuvendit të Kosovës pa praninë e nënkryetarit të PDK-së. Hamza i cilësoi këto pretendime si situata hipotetike. Ai bëri të ditur se nuk ka arsye për një tërheqje të tillë në këtë moment, duke nënvizuar se veprimet e partisë do të ndërmerren vetëm kur të ketë nevojë ose arsye konkrete për diçka të tillë.