Kryetari i Partisë Demokratike të Kosovës (PDK), Bedri Hamza, në emisionin Debat Plus, u pyet nëse partia e tij do ta mbështesë presidenten aktuale Vjosa Osmani për një mandat të dytë.
Ai shpjegoi se përveç vullnetit politik ekzistojnë kushtet formal-juridike: kandidati duhet të mbledhë 30 nënshkrime, duhet të ketë dy kandidatë me nga 30 nënshkrime të depozituara në Kuvend, si dhe 80 deputetë në sallë për votim. Sipas tij, nuk ka ende ndonjë kandidaturë zyrtare që plotëson këto kërkesa.
Hamza vuri në dukje se PDK nuk ka numrat e mjaftueshëm për të propozuar kandidatin e vet – i nevojiten edhe tetë nënshkrime shtesë. Edhe nëse Osmani i ka të siguruara këto tetë, ajo nuk i ka të garantuara nënshkrimet e PDK-së.
Ai rikujtoi se Osmani u zgjodh presidente me propozim të Lëvizjes Vetëvendosje dhe mbështetje të Lidhjes Demokratike të Kosovës (LDK). Presidentja mori pjesë në marshin “Drejtësi, jo politikë” dhe diskutoi me Donald Trump për ish-krerët e Ushtrisë Çlirimtare të Kosovës (UÇK) të mbajtur në Hagë. Hamza theksoi se deri më 28 dhjetor ajo ka bërë veprime që i kanë shkuar në favor të Lëvizjes Vetëvendosje.