Në mjediset e Bazilikës së Nanës së Këshillit të Mirë është çelur një ekspozitë me objekte me vlerë të madhe historike dhe shpirtërore. Ekspozita përfshin piktura, artefakte fetare dhe historike, si dhe veshje të Nënë Terezës, të publikuara për herë të parë.
Një ndalesë e veçantë e ekspozitës është veshja origjinale e përdorur nga Nënë Tereza gjatë rinisë së saj. Në ekspozitë janë paraqitur edhe objekte fetare që gjatë periudhës së komunizmit ishin ruajtur të groposura nga familje shkodrane katolike dhe muslimane.
Ekspozita është pjesë e aktiviteteve të planifikuara nga Kisha Katolike Shqiptare për 130-vjetorin e shpalljes së Nanës së Këshillit të Mirë si pajtore e Shqipërisë.