Ministria e Bujqësisë dhe Zhvillimit Rural hap më 20 maj aplikimet për skemën e subvencioneve të miratuara nga qeveria, pas një vonese prej një muaji e gjysmë ose mbi 40 ditë. Vonesa lidhet me mungesën e kontratës së mirëmbajtjes së sistemit të aplikimeve në platformën e-Albania, si dhe draft propozimit të ministrave të Bujqësisë dhe Financave që përcakton kriteret e përfitimit.
Në total, për sektorin bujqësor janë vënë 52 milionë euro. Nga këto, 27 milionë euro shkojnë për Skemën Kombëtare, ndërsa 25 milionë euro për Skemën e Investimeve. Për këtë të fundit, 20 milionë euro u takojnë fermerëve të shpallur fitues në vitin 2025, të cilët përmes AZHBR kanë përfituar vetëm 30% të fondit. Për vitin 2026, buxheti për investime është tkurrur në 5 milionë euro, pra me 75% më pak, duke kufizuar mbështetjen për zgjerimin e fermave.
Skema Kombëtare e këtij viti sjell ndryshime në sektorin e blegtorisë, ku numri minimal i krerëve për përfitim është përgjysmuar. Për herë të parë, mbështetje financiare marrin edhe fermerët që rrisin derra.
Ndryshe nga viti paraardhës, nuk jepet më subvencion për naftën, me argumentin se lënda djegëse nuk përdorej gjithmonë për traktorët që punojnë tokën. Aplikimet kryhen online, me asistencë nga zyrat e agropikave.