Ramush Haradinaj, kryetar i Aleancës për Ardhmërinë e Kosovës (AAK), në emisionin Pressing të televizionit T7, shprehu habi për mospropozimin e Vjosa Osmanit si kandidate për presidente nga kryeministri Albin Kurti.
Ai theksoi se suksesi i Lëvizjes Vetëvendosje (LVV) në zgjedhje ishte rezultat i garës së përbashkët, ku Osmani dha kontribut të rëndësishëm. "Jam i çuditur që Albin Kurti nuk e ka propozuar Vjosa Osmanin, sepse edhe e arritura e LVV-së është kontribut edhe i saj. Ka qenë garë e përbashkët, është bukur e habitshme moskandidimi i saj", deklaroi Haradinaj. Sipas tij, kjo nënkupton anashkalim politik të Osmanit.
Në të njëjtën intervistë, Haradinaj zbuloi se një numër i respektuar deputetësh të Lëvizjes Vetëvendosje (VV) i kanë premtuar votën nëse ai kandidohet për president. "Një numër i respektuar, jo i vogël, edhe i deputetëve të VV-së më kanë thënë ‘nëse je në garë, e ke votën time’, e kanë thënë edhe në takime në prani të kolegëve të vetë", tha ai. Haradinaj shtoi se këta deputatë janë të gatshëm të deklarohen vetë.