Ramush Haradinaj, kryetar i Aleancës për Ardhmërinë e Kosovës (AAK), mori pjesë në homazhet për 27-vjetorin e Masakrës së Krushës së Madhe në Krushë të Madhe, më 26 mars 2026.
Gjatë fjalimit, ai u bëri thirrje qytetarëve për forcimin e ushtrisë dhe ruajtjen e marrëdhënieve të palëkundura me Shtetet e Bashkuara të Amerikës (SHBA) dhe NATO-në. Sipas tij, kjo është rruga e vetme për të garantuar që masakrat si ajo e Krushës të mos përsëriten më kurrë në Kosovë.
Haradinaj e cilësoi suksesin e shtetit dhe fuqizimin e institucioneve të sigurisë si "hakmarrjen" më të mirë ndaj së kaluarës së dhimbshme. Ai shprehu respekt për civilët, gratë, pleqët, fëmijët dhe të rinjtë e vrarë pafajësisht, si dhe shqetësim për të pagjeturit dhe mungesën e drejtësisë në masakrat në Krushë të Madhe, Krushë të Vogël, Celinë, Pastasellë, Fortesë dhe vende të tjera.
Ai theksoi se është e pashpjegueshme gjykimi i Ushtrisë Çlirimtare të Kosovës (UÇK). "Nuk ka rëndësi emri – Ramush, Fatmir, Hashim, Kadri, Jakup apo Rexhep – bëhet fjalë për njerëz që luftuan për të mbrojtur veten", tha ai.
Haradinaj nënvizoi nevojën për aleanca të forta, sepse Kosova nuk mund të përballet e vetme me armiq më të mëdhenj e me miq. "Duhet ta mbajmë fort me Amerikën, që të mos na përsëritet historia", deklaroi ai, duke kujtuar rolin e SHBA-së dhe NATO-së në kthimin në tokën amtare.