Ramush Haradinaj ka kujtuar 29 marsin e vitit 1999, duke nderuar viktimat e vrarë në fshatrat Beleg e Irzniq të Deçanit dhe Poterq të Klinës. Sot në Beleg ai ka ndarë dhimbjen me familjarët, të cilët ende vuajnë mungesën e të dashurve.
Haradinaj shkruan se viktimat, të paarmatosur, u ekzekutuan pa mëshirë nga forcat serbe, mes tyre gra, pleq e fëmijë.
Ai kujtoi se një ditë më parë u përkujtua themelimi i Brigadës 137 “Gjakova”, ndërsa sot u bënë homazhe në nderim të 14 bashkëluftëtarëve të rënë në Shishman të Bokës. Haradinaj i cilësoi ata djem të zotë e luftëtarë të dalluar, disa prej të cilëve i kishte njohur në frontet e luftës.
Sipas tij, shteti i Kosovës u fitua me gjak e sakrificë, ndërsa e vërteta e luftës çlirimtare nuk mund të shtrembërohet. Serbia kishte synim shfarosjen e shqiptarëve, por këtij synimi i dhanë fund luftëtarët e UÇK-së në tokë dhe NATO në qiell, e udhëhequr nga Amerika.
“Çdo përpjekje për ta ndryshuar këtë të vërtetë është e dështuar dhe kushdo që tenton ta bëjë këtë, do të mbetet me turp”, deklaroi Haradinaj.