Ramush Haradinaj, kryetar i Aleancës për Ardhmërinë e Kosovës (AAK), u takua më 14 janar 2026 me Peter Sørensen, përfaqësuesin special të Bashkimit Evropian për dialogun Kosovë–Serbi.
Gjatë takimit, Haradinaj çmoi rolin e Sorensenit dhe të BE-së për Kosovën dhe rajonin. Ai theksoi rëndësinë e partneritetit BE–SHBA për arritjet e deritanishme.
Haradinaj e njoftoi Sorensenin për qëndrimin e AAK-së: partia do të japë kontribut të drejtpërdrejtë për formimin sa më të shpejtë të institucioneve të reja, të dalura nga zgjedhjet e fundit. Ai shprehu gjithashtu angazhimin për rikthimin e Kosovës në rrugën e integrimit euroatlantik.
Postimi i plotë i Haradinajt në Facebook:
Sot prita Përfaqësuesin Special të BE-së për dialogun, z. Peter Sørensen. Në takim çmova rolin e tij dhe të Bashkimit Evropian, duke theksuar po ashtu rëndësinë e partneritetit BE–SHBA për sukseset e arritura në Kosovë dhe në rajon. E njoftova z. Sørensen për qëndrimin e Aleancës për të dhënë kontribut të drejtpërdrejtë në formimin sa më të shpejtë të institucioneve të reja, të dala nga zgjedhjet, si dhe për angazhimin tonë në rikthimin e vendit në rrugën e integrimit euroatlantik.
Sipas burimeve, Sorensen vizitoi Kosovën për të nisur vitin me takime pune dhe shprehu optimizëm për progres në dialog. Takimi me Haradinajn ishte i fundit në serinë e bisedave me liderët politikë, pas atyre me presidenten dhe kryeministrin në detyrë.