Ambasadori i Britanisë së Madhe në Kosovë, Jonathan Hargreaves, ka deklaruar se siguria evropiane qëndron në thelb të miqësisë mes Britanisë së Madhe dhe Kosovës. Kjo deklaratë erdhi pas takimeve të zhvilluara me Komandantin e Forcës së Sigurisë së Kosovës (FSK), gjenerallejtënant Bashkim Jashari, dhe ministrin në detyrë të Mbrojtjes, Ejup Maqedonci.
Diskutimet, të mbajtura në praninë e Atasheut të Mbrojtjes dhe Këshilltarit të Mbrojtjes, u fokusuan në rikonfirmimin e angazhimit britanik për zhvillimin e vazhdueshëm të FSK-së. Ambasadori Hargreaves theksoi se mbështetja e Londrës synon përafrimin e forcave kosovare me standardet dhe strukturat e NATO-s.
Sipas ambasadorit, forcimi i bashkëpunimit me Forcat e Armatosura të Mbretërisë së Bashkuar është një mekanizëm thelbësor për ndërtimin e një të ardhmeje më të sigurt, jo vetëm për Kosovën, por edhe për rajonin në tërësi.