Harry Bajraktari, veprimtar i çështjes kombëtare dhe përfaqësues i komunitetit shqiptaro-amerikan në SHBA, ka njoftuar se i ka dërguar letër zyrtare presidentit amerikan Donald Trump.
Kjo letër shpreh shqetësimin e tij në lidhje me proceset gjyqësore në Gjykatën Speciale (Dhomat e Specializuara të Kosovës) në Hagë, ku po gjykohen ish-krerët e Ushtrisë Çlirimtare të Kosovës (UÇK).
Në letër, Bajraktari kërkon nga SHBA-të angazhim për të garantuar një gjykim të drejtë dhe të paanshëm për të pandehurit, përfshirë Hashim Thaçin, Kadri Veselin, Jakup Krasniqin dhe Rexhep Selimin, si dhe të tjerët në paraburgim. Ai thekson rolin historik të SHBA-ve në Kosovë dhe nevojën për respektim të standardeve ndërkombëtare të drejtësisë dhe të drejtave të njeriut.
Njoftimin e bëri përmes një postimi në Facebook, ku shkruan: “Si qytetar amerikan dhe përfaqësues i komunitetit shqiptaro-amerikan, sot i kam dërguar një letër zyrtare Presidentit Donald J. Trump, ku kam shprehur shqetësimin tim lidhur me Gjykatën Speciale dhe domosdoshmërinë që Shtetet e Bashkuara të angazhohen për t’u siguruar që ky mekanizëm të garantojë një gjykim të drejtë për ish-udhëheqësit e Kosovës — Hashim Thaçin, Kadri Veselin, Jakup Krasniqin, Rexhep Selimin — dhe për të tjerët që po mbahen në Hagë”.
Bajraktari është biznesmen i njohur në fushën e pasurive të paluajtshme dhe medias në SHBA, me angazhim të gjatë në lobim për çështjen shqiptare dhe mbështetje për ish-udhëheqësit e UÇK-së. Letra vjen në kohë kur procesi gjyqësor vazhdon, ndërsa prokuroria ka kërkuar dënim me nga 45 vite burg për secilin të pandehur.