Hashim Thaçi, ish-president i Kosovës, ka dhënë një intervistë nga burgu për gazetën gjermane Frankfurter Allgemeine Zeitung.
Gazetari Michael Martens, që ndjek prej kohësh zhvillimet në Ballkan, ka ndarë në platformën X disa pyetje të drejtuara Thaçit. Intervista e plotë pritet të publikohet gjatë mbrëmjes së sotme.
Një pyetje lidhet me ndikimin e procesit gjyqësor në Hagë mbi interpretimin e historisë së Kosovës. Michael Martens pyeti: «Pra, a ekziston rreziku që ky gjyq të shtrembërojë tablonë historike të asaj që ndodhi në Kosovë në vitet 1990, sepse për vëzhguesit sipërfaqësorë mund të ushqejë narrativën e rreme se ‘të dyja palët kanë kryer krime me peshë të barabartë’? ».
Një pyetje tjetër trajton rolin e ish-prokurorit Jack Smith, i cili ngriti aktakuzën ndaj krerëve të UÇK-së. Gazetari shkroi: «Donald Trump dhe i dërguari i tij (ish) i posaçëm Richard Grenell kanë shprehur opinione shumë negative për prokurorin Jack Smith, i cili ngriti aktakuza ndaj të dyve (fillimisht ndaj Thaçit, pastaj ndaj Trumpit). A e konsideron z. Thaçi Smith-in thjesht si një instrument politik në një lojë më të madhe? ».
Kjo është intervista e dytë e Hashim Thaçit nga burgu, pas atyre të mëhershme për media vendore në Kosovë.