Ish-presidenti Hashim Thaçi ka shmangur komentet direkte lidhur me qasjen e kryeministrit të Kosovës, Albin Kurti, ndaj tij dhe ish-krerëve të tjerë të Ushtrisë Çlirimtare të Kosovës (UÇK) që po mbahen në paraburgim në Hagë. Gjatë një interviste për emisionin Debat Plus me gazetarin Ermal Panduri, ai u pyet nëse do ta priste Kurtin në rast se ky i fundit do të shprehte vullnet për ta vizituar atë.
Në përgjigjen e tij, Thaçi deklaroi: "Nuk deklarohem për situata hipotetike". Lidhur me faktin që kryeministri nuk ka vizituar asnjërin nga katër ish-krerët e UÇK-së, ish-presidenti u shpreh shkurtimisht se nuk dëshiron të merret me disponimet apo sjelljet e të tjerëve. Po ashtu, ai nuk pranoi të japë qëndrim as për qasjen e përgjithshme të qeverisë së udhëhequr nga Kurti ndaj Dhomave të Specializuara, duke u kufizuar në deklaratën se nuk ka koment për këtë çështje.
Në të njëjtën intervistë, ish-presidenti u pyet edhe për praninë e kryetarit të Kuvendit, Glauk Konjufca, në sallën e gjyqit. Thaçi shpjegoi se në galeri kishte shumë njerëz dhe se vëmendja e tij ishte përqendruar te familjarët, të cilët ishin të vendosur në një hapësirë më të dukshme. Ai theksoi se është përshëndetur nga distanca me të gjithë të pranishmit në sallë.