Abelard Tahiri, ish-deputet i Partisë Demokratike të Kosovës (PDK), zhvilloi një vizitë në Hagë më 19 mars 2026, ku u takua me ish-presidentin Hashim Thaçi.
Në një postim në Facebook, Tahiri shkroi se vizitat e tij në Hagë që nga koha e paraburgimit të Thaçit dhe bashkëpunëtorëve të tij kanë qenë të shpeshta dhe të mbushura me emocione të forta. Ai theksoi se gjatë kësaj vizite e gjeti Thaçin po aq të fortë sa në takimet e mëparshme.
Sipas Tahirit, Thaçi po përballon situatën me një ndjenjë të thellë krenarie, e cila mban gjallë shpirtin e popullit të Kosovës dhe buron nga lufta për liri. Ai vlerësoi Thaçin dhe bashkëluftëtarët e tij si shtylla të palëkundura mbi të cilat qëndrojnë shteti dhe liria e Kosovës.
Tahiri shprehu dëshirën që kjo të ketë qenë vizita e tij e fundit në Hagë dhe që takimi i radhës të zhvillohet në liri, në Kosovë, për të cilën Thaçi ka dhënë gjithçka. Në fund, ai përcjelli përshëndetjet e Thaçit nga Haga.
Postimi i plotë i Abelard Tahirit:
"Vizitat e mia në Hagë gjatë këtyre viteve, që nga koha kur Presidenti Thaçi me shokë ndodhen në paraburgim, kanë qenë të shpeshta dhe shpesh të mbushura me emocione të forta. Sot, në Hagë, e takova Presidentin po aq të fortë sa në çdo vizitë tjetër. Ai po e përballon këtë padrejtësi me një ndjenjë të tëllë krenarie, e cila mban gjallë shpirtin e popullit të Kosovës, një krenari që buron nga lufta për liri. Presidenti dhe shokët e tij janë shtylla të palëkundura, mbi të cilat qëndrojnë fort shteti dhe liria jonë. Uroj që kjo të ketë qenë vizita ime e fundit në këtë vend dhe që shumë shpejt të takohemi në liri, në Kosovën për të cilën ai dha gjithçka. Presidenti ju dërgon të fala nga Haga!"