Ish-deputeti i PDK-së, Abelard Tahiri, ka zhvilluar këtë të hënë një vizitë në Hagë, ku është takuar me ish-presidentin Hashim Thaçi.
Lajmin e ka bërë të ditur vetë Tahiri përmes një shkrimi në rrjetet sociale, duke e përshkruar takimin si një moment me emocione të veçanta. Sipas tij, ish-presidenti Thaçi vijon të shfaqë forcën, dinjitetin dhe besimin që e kanë karakterizuar gjithmonë. Tahiri nënvizoi se bashkëbisedimet me të mbeten frymëzuese dhe të mbushura me shpresë për të ardhmen.
Në deklaratën e tij, Tahiri vuri në dukje se, pavarësisht sfidave të vazhdueshme të procesit gjyqësor, Thaçi ruan qetësinë, vendosmërinë dhe bindjen se e vërteta do të dalë në dritë. Vizita u mbyll me urimin e Tahirit që kjo periudhë të përfundojë sa më shpejt, në mënyrë që ish-presidenti dhe bashkëluftëtarët e tij të kthehen pranë familjeve dhe popullit të tyre.