Hashim Thaçi, ish-president i Kosovës, ka dhënë një intervistë ekskluzive për emisionin “Adresa” në Kanal10 me moderatorin Arben Ahmetin. Intervista u transmetua nga qendra e paraburgimit në Hagë, ku Thaçi po mbahet në pritje të procesit gjyqësor.
Ai rrëfeu emocionet nga vizita e shkurtër në Prishtinë pas vdekjes së babait të tij. Me lejen e DHSK-së, Thaçi udhëtoi në Kosovë rreth një vit më parë. Ai falënderoi qytetarët për solidarizimin dhe ngushëllimet, duke thënë se brenga e izolimit të tij mund të ketë përshpejtuar keqësimin e gjendjes së babait.
Në intervistë, Thaçi foli për izolimin, procesin gjyqësor, raportet e Kosovës me Perëndimin dhe sfidat politike që, sipas tij, po e përcjellin shtetin. Ai theksoi se është “plotësisht i pafajshëm”.
Thaçi përmendi ish-zyrtarin evropian Thorbjørn Jagland, ish-udhëheqës i Këshillit të Evropës, duke e kritikuar për mënyrën se si trajtoi raportin e Dick Marty për pretendimet mbi trafikimin e organeve. “Ndërsa Thorbjørn Jagland si udhëheqës i Këshillit të Evropës për një dekadë e vlerësonte raportin e Dick Marty gjoja për trafikim organesh sikur të ishin germa fjalë dhe fjali të nxjerra nga BIBLIA. I kam thënë në zyrën e tij në Strasburg: 'Vështrimi juaj është krejtësisht i gabuar'. M’u përgjigj: 'Të dëgjova, por jam në kontakt mirëbesimi me liderë të tjerë kosovarë'. Ai vazhdonte në të tijën (nuk u befasova nga përfshirja e tyre në dosjen Epstein - ku qartë u zbardhen lidhjet e tyre të vjetra dhe të reja me rusët). Atë kohë unë nuk i dija saktësisht këto lidhje, por veprimet e tyre në raport me Kosovën me kishin bindur se ata qonin ujë në mullirin e Moskës dhe Beogradit”, deklaroi Thaçi.
Ai pretendoi se kishte paralajmëruar për qasje të gabuar ndaj Kosovës dhe se disa figura evropiane kishin vepruar në favor të narrativave që i shërbejnë interesave të Beogradit dhe Moskës.