Ish-presidenti i Kosovës, Hashim Thaçi, i cili ndodhet në paraburgim në Hagë, ka përcjellë ngushëllimet e tij për familjen e ish-komandantit të Ushtrisë Çlirimtare të Kosovës (UÇK), Sahit Jashari, me rastin e ndarjes së tij nga jeta.
Lajmi është bërë i ditur nga djali i tij, Endrit Thaçi, përmes një postimi në platformën Instastory. Endrit Thaçi ka treguar se ka zhvilluar një bisedë telefonike me të atin, i cili shprehu pikëllimin për humbjen e luftëtarit.
Në mesazhin e tij, ish-presidenti Thaçi e cilësoi të ndjerin si një luftëtar të orëve të para të UÇK-së dhe theksoi rëndësinë e kontributit të tij për lirinë e vendit.
"Sapo përfundova një bisedë telefonike me babin. Ishte thellësisht i pikëlluar me ndarjen nga jeta të luftëtarit të orëve të para të UÇK-së, Sahit Jasharit. Nga Haga, ai më kërkoi t’ia përcjell ngushëllimet më të sinqerta familjes Jashari, bashkëluftëtarëve dhe miqve. Ata që iu përgjigjën të parët kushtrimit të lirisë nuk do të harrohen kurrë!", ka shkruar Endrit Thaçi në postimin e tij.