Politologu Ermal Hasimja, i ftuar në emisionin “Kjo Javë”, deklaroi se negociatat me partitë opozitare për t’u bashkuar Forumin e Dialogut Politik dhe për krijimin e një Fronti opozitar qytetar janë në vijim. Midis tyre përfshihet edhe lëvizja “Shqipëria Bëhet”.
Hasimja sqaroi se me grupin negociator të kësaj force janë dëgjuar dhe diskutuar kërkesat e tyre. Procesi zhvillohet si një negociim ambulant, që kërkon kohën e vet deri në dakordësi me të gjithë palët.
Ai përmendi takime të zhvilluara me kreun e PD-së dhe aleatët e saj, si dhe negociim online me lëvizjen e Diasporës. Qëllimi është që në ditën e tryezës së dialogut palët të jenë të dakordësuara.
Duke komentuar skepticizmin ndaj nismave opozitare, Hasimja tha se ai i zotit Duka reflekton edhe atë të shoqërisë. Sipas tij, situata është e tillë që ke përballë një figurë që i ka pothuajse të gjitha pushtetet, ndërsa bëhet keq kur i del nga dora institucione si SPAK e GJKKO.
Hasimja theksoi se suksesi i protestave, përfshirë atë të Lapajt, dhe i formave të tjera bashkë, varet nga shfaqja në shesh e qytetarëve që qëndrojnë larg politikës. Nëse aty do të jenë vetëm anëtarë partie, nuk do të arrihet ndonjë rezultat i madh.