Albulena Haxhiu, ish-ministrja e Drejtësisë dhe nënkryetare në detyrë e Kuvendit të Kosovës, ka reaguar ndaj kërkesës së Prokurorisë së Dhomave të Specializuara në Hagë për dënim me 45 vjet burg për secilin nga ish-krerët e Ushtrisë Çlirimtare të Kosovës (UÇK), në total 180 vjet.
Në një postim në rrjetet sociale, Haxhiu e ka cilësuar këtë kërkesë si "akt padrejtësie dhe fyerje ndaj viktimave shqiptare të luftës". Ajo ka thënë se nuk bëhet fjalë për përpjekje për drejtësi, por për "orvatje prokuroriale për ndëshkim politik dhe selektiv ndaj një lufte të drejtë çlirimtare".
Haxhiu ka theksuar krimet e kryera nga Serbia gjatë luftës, si vrasje, masakra, përdhunime seksuale si armë lufte dhe dëbime masive të popullsisë, të cilat janë të dokumentuara dhe dëshmuara ndërkombëtarisht. Ajo ka shtuar se Serbia nuk u përball kurrë me drejtësinë në mënyrë serioze, ndërsa kriminelët e saj u ricikluan në pushtet, u amnistuan dhe u privilegjuan.
Sipas saj, në vend të gjykimit të agresorit u krijua një mekanizëm që kriminalizon rezistencën e popullit. "UÇK po trajtohet sikur të ishte shkaku i luftës, e jo përgjigja ndaj terrorit shtetëror serb. Ky është shtrembërim i historisë", ka shkruar ajo.
Haxhiu ka përfunduar se kërkesa për aq vite burgim për drejtuesit dhe ushtarët e UÇK-së është tendencë për të zhveshur Kosovën nga e drejta morale e çlirimit dhe për ta barazuar viktimën me xhelatin. Reagimi vjen në fazën përmbyllëse të gjykimit në Hagë ndaj ish-udhëheqësve të UÇK-së.
Përditësime
Kryeministri Albin Kurti reagoi në Facebook ndaj kërkesës për 45 vjet burgim ndaj ish-krerëve të UÇK-së.
Ai shkroi: "Thelbi moral dhe historik i luftës sonë çlirimtare konsiston në mbijetesën dhe dinjitetin e popullit. UÇK-ja ishte bartëse e një lufte të drejtë, ruajtëse dhe mbrojtëse".
Kurti deklaroi se UÇK-ja nuk kishte plan për shfarosjen e popujve të tjerë apo civilëve dhe se kërkesa nuk mbështetet në standarde ndërkombëtare.
Kryeministri Albin Kurti deklaroi se "dhuna e apartheidit po shndërrohej në gjenocid shtetëror". Ai paralajmëroi se "çdo përpjekje për t’i shkëputur veprimet individuale nga ky kontekst rrezikon të deformojë të vërtetën". Kurti e cilësoi luftën si "kryengritje anti-kolonialiste" dhe shtoi se "institucionet e Kosovës do të vazhdojnë të mbrojnë të vërtetën".