Albulena Haxhiu, ushtruesja e detyrës së presidentes, në Ditën Botërore të Lirisë së Shtypit, ka shprehur mirënjohje për të gjithë ata që punojnë me integritet për ta mbajtur të saktë dhe të ndershme hapësirën publike.
Përmes një postimi në Facebook, ajo thotë se epoka jonë karakterizohet me ritëm të shpejtë informimi, ndaj sfidat për ta dalluar faktin nga interpretimi janë gjithnjë e më të mëdha.
Haxhiu vlerëson rolin thelbësor të mediave profesionale dhe gazetarëve të përkushtuar për informimin e drejtë të qytetarëve. Sipas saj, kur e vërteta cenohet, lajmi ngatërrohet me manipulim, gjysmë të vërtetat zëvendësojnë faktet dhe interesat e fshehura flasin në emër të publikut, qytetari humb orientimin dhe demokracia dobësohet.
Në postim thuhet: «Hapësira publike ka nevojë për ndershmëri, për fakte, për verifikim dhe përgjegjësi. Këto janë vlera që e forcojnë besimin dhe e mbajnë të shëndetshme demokracinë tonë. Falënderoj të gjithë punonjësit e mediave që verifikojnë faktet, transmetojnë lajmet dhe i shërbejnë publikut me ndershmëri! Gazetaria me integritet është shërbim për qytetarët dhe për Republikën».