Pas përfundimit të zgjedhjeve të 7 qershorit, proceset institucionale në Kosovë pritet të hyjnë në fazën e konstituimit. Ushtruesja e detyrës së presidentes, Albulena Haxhiu, bëri të ditur se sapo Komisioni Qendror i Zgjedhjeve (KQZ) të certifikojë rezultatet, do të fillojnë hapat për formimin e institucioneve të reja.
Haxhiu sqaroi se renditja e proceseve parasheh që fillimisht të konstituohet Kuvendi dhe të votohet Qeveria. Pas konstituimit të legjislativit, kryetari ose kryetarja e ri/e do të ketë autoritetin kushtetues për të mandatuar kandidatin për kryeministër. Ajo shprehu bindjen se shumica parlamentare i ka siguruar 61 votat e nevojshme për formimin e ekzekutivit.
Sa i përket pozitës së presidentit, Haxhiu paralajmëroi takime me partitë politike për të arritur një konsensus. Ajo mbrojti qëndrimin se zgjidhja më e përshtatshme për vendin do të ishte zgjedhja e një kandidati që nuk është anëtar i ndonjë partie politike, duke mohuar kategorikisht mundësinë që ajo të jetë kandidate për këtë post.
Sipas procedurave, pasi të konstituohet Kuvendi, ai ka afat prej 60 ditësh për të zgjedhur presidentin e ri me mandat pesëvjeçar. Haxhiu vlerësoi se qytetarët përmes votës kanë dërguar mesazhin e tyre kundër qasjeve bllokuese, duke kërkuar vazhdimin e punës institucionale.