Albulena Haxhiu, ushtruese e detyrës së presidentit të Kosovës dhe kryetare e Kuvendit, deklaroi më 8 prill 2026 se vendi nuk ka kohë për të humbur në zgjedhjen e presidentit të ri. Ajo shprehu shpresën që presidenti të zgjidhet brenda afatit kushtetues, në të kundërtën do të shpallë datën e zgjedhjeve të reja.
Sipas aktgjykimit të Gjykatës Kushtetuese të marsit, deputetët kanë afat deri më 28 prill për të zgjedhur presidentin. Nëse kjo nuk ndodh, Kuvendi konsiderohet i shpërndarë dhe zgjedhjet e parakohshme mbahen brenda 45 ditësh.
Haxhiu, pas mbledhjes së kryesisë së Kuvendit, theksoi se është e gatshme të kontribuojë duke organizuar takime dhe diskutime me grupet parlamentare, nëse ato e kërkojnë. “Unë mirëpres vazhdimin e takimeve që kanë ndodhur në ditët e fundit. Urojmë që t’i lëmë anash të gjitha dallimet dhe të gjejmë zgjidhje për presidentin. Uroj që të mos vijë situata që të shpall datën e zgjedhjeve”, tha ajo.
Ajo ritheksoi se grupet parlamentare dhe partitë duhet të dëshmojnë vullnet për zgjidhje. Një ditë më parë, Haxhiu kishte deklaruar se është e hapur për ndihmë në çështjen e presidentit.
Mandati i ish-prezidentes Vjosa Osmani përfundoi më 4 prill. Ditë më parë, kryeministri dhe kreu i Lëvizjes Vetëvendosje, Albin Kurti, u takua me kreun e Lidhjes Demokratike të Kosovës, Lumir Abdixhiku. Takimi nuk arriti marrëveshje për presidentin, por paralajmërohet vazhdim i bisedave me Partinë Demokratike të Kosovës.