Albulena Haxhiu, ushtruesja e detyrës së presidentes së Republikës së Kosovës, priti në takim Kreshnik Radoniqi, kryesuesin e Komisionit Qendror të Zgjedhjeve (KQZ).
Takimi u zhvillua për të diskutuar hapat institucionalë në kuadër të shpalljes së zgjedhjeve të reja. U theksua rëndësia e përgatitjes në kohë të të gjitha veprimeve që lidhen me organizimin e procesit zgjedhor, në përputhje me Kushtetutën, ligjin dhe standardet demokratike.
Haxhiu vlerësoi rolin e KQZ-së në garantimin e një procesi të rregullt, të besueshëm dhe gjithëpërfshirës. Ajo theksoi se qytetarët e Kosovës kanë dëshmuar vazhdimisht pjekuri demokratike dhe besim në zgjedhje.
Gjatë takimit u diskutuan afatet ligjore, përgatitjet administrative, koordinimi ndërinstitucional si dhe zhvillimi i procesit pa vonesa dhe me standarde të larta profesionale. Përgatitjet e hershme dhe të koordinuara konsiderohen të domosdoshme për një proces të suksesshëm zgjedhor.