Drejtori i Përgjithshëm i Policisë së Shtetit, Skënder Hita, ka zhvilluar një mbledhje urgjente me drejtuesit e Akademisë së Sigurisë për të analizuar situatën pas raportimit të helmimit të 60 kursantëve. Hita ka qenë i pranishëm në ambientet e Akademisë gjatë orëve të mesnatës, menjëherë pas transferimit të grupit të parë të studentëve drejt Qendrës Spitalore Universitare të Tiranës (QSUT).
Sipas informacioneve të bëra publike nga Policia e Tiranës, incidenti shëndetësor u shfaq fillimisht te 31 kursantë mbrëmjen e djeshme dhe në orët e para të mëngjesit. Këta të fundit morën ndihmën e nevojshme mjekësore dhe janë kthyer në ambientet e Akademisë në gjendje të mirë shëndetësore. Mëngjesin e sotëm, 29 kursantë të tjerë të Kolegjit Profesional të Formimit Policor shfaqën simptoma të ngjashme dhe u dërguan gjithashtu drejt Repartit Infektiv.
Në lidhje me këtë rast, është ngritur një grup i posaçëm hetimor, i cili po operon në bashkëpunim me Agjencinë e Mbikëqyrjes Policore (AMP) dhe nën drejtimin e Prokurorisë. Autoritetet po kryejnë veprimet e nevojshme për dokumentimin e plotë të rrethanave, ndërsa po priten rezultatet e analizave laboratorike për të përcaktuar me saktësi shkakun e helmimit dhe për të vendosur përgjegjësitë ligjore.