Një grup prej 60 kursantësh të Kolegjit Profesional të Formimit Policor pranë Akademisë së Sigurisë kanë shfaqur probleme shëndetësore gjatë orëve të fundit. Sipas njoftimit zyrtar të Policisë së Shtetit, rasti është ndarë në dy faza të paraqitjes për ndihmë mjekësore në Repartin Infektiv të QSUT-së.
Sipas të dhënave, 31 kursantë u dërguan për trajtim gjatë mbrëmjes së djeshme dhe orëve të para të mëngjesit. Pasi morën ndihmën e nevojshme mjekësore, ata janë kthyer në ambientet e Akademisë në gjendje të mirë shëndetësore. Ndërkohë, 29 kursantë të tjerë janë paraqitur në qendrën shëndetësore të Akademisë mëngjesin e sotëm dhe më pas janë dërguar në spital për trajtim të mëtejshëm.
Menjëherë pas ngjarjes, është ngritur një grup i posaçëm hetimor për të dokumentuar rrethanat dhe për të përcaktuar përgjegjësitë. Hetimet po kryhen në koordinim me Agjencinë e Mbikëqyrjes Policore (AMP) dhe nën drejtimin e Prokurorisë.
Në kuadër të verifikimeve, Autoriteti Kombëtar i Ushqimit (AKU) ka marrë mostra të ushqimeve të konsumuara. Këto mostra do t'i nënshtrohen analizave laboratorike për të zbardhur nëse simptomat janë shkaktuar nga ushqimi. Njëkohësisht, kursantëve u janë kryer analizat mjekësore dhe priten përgjigjet zyrtare për konfirmimin e diagnozës.
Përditësime
Hetimet zbuluan se ky është rasti i dytë i ngjashëm në Akademinë e Sigurisë brenda pak muajsh. Analizat laboratorike të incidentit të mëparshëm konfirmuan praninë e baktereve Escherichia coli dhe stafilokok në ushqimin e ofruar nga e njëjta kompani kateringut.