Rreth 40 studentë të Akademisë së Sigurisë në Tiranë dyshohet se janë helmuar pas konsumimit të ushqimit gjatë drekës së së mërkurës. Menjëherë pas ngrënies, ata shfaqën shqetësime shëndetësore, ndërsa disa patën komplikacione më të rënda dhe u dërguan në spital për trajtim.
Simptomat e raportuara përfshijnë të vjella dhe diare. Rreth 10 ambulanca mbërritën në akademi për të transportuar të prekurit. Gjendja e tyre është nën kontroll dhe disa janë larguar nga spitali pas trajtimit.
Akademia e Sigurisë siguron shërbimin ushqimor përmes një kompanie private kateringu, e cila ofron tre vakte ditore për studentët. Dyshimet drejtohen te ushqimi i konsumuar në mensë, ndoshta ai i datës 6 maj, sipas disa burimeve.
Studentët kanë ngritur më parë shqetësime për cilësinë e ushqimit. Institucionet përkatëse kanë nisur hetimet për të verifikuar zinxhirin e furnizimit, përgatitjen e ushqimit dhe për të përcaktuar përgjegjësit e mundshëm.
Përditësime
Koha Jone raporton 56 studentë të helmuar në Akademinë e Sigurisë, në vend të rreth 40.
Sori-AL furnizoi drekën për studentët e Akademisë së Sigurisë.
Menuja përfshinte sallatë perimesh të ziera, gjellë patate me tave me presh, makarona ose pilaf, mish, biskota, banane dhe bukë.