Në periudhën 10 deri më 13 korrik 2026, rreth 70 pacientë janë paraqitur në Klinikën Infektive të Qendrës Klinike Universitare të Kosovës (QKUK) me simptoma të dyshuara të helmimit nga ushqimi. Sipas njoftimit zyrtar të institucionit, pacientët kanë shfaqur shenja si ethe, temperaturë, dhimbje barku, të vjella dhe diarre disa orë pas konsumimit të ushqimit.
Sipas të dhënave, një pjesë e personave të prekur kishin konsumuar sanduiçë në një nga pikat e rrjetit të restoranteve “Sach Pizza” në Prishtinë. Të gjitha rastet e hospitalizuara janë evidentuar në Sistemin e Mbikëqyrjes së Sëmundjeve Ngjitëse (SMSN) dhe janë raportuar në Inspektoratin Shëndetësor dhe Institutin Kombëtar të Shëndetësisë Publike të Kosovës (IKShPK). Pacientët që po marrin trajtim spitalor ndodhen nën mbikëqyrje të vazhdueshme mjekësore.
Organet e drejtësisë kanë konfirmuar se janë duke kryer hetime për këtë ngjarje. Zëdhënësi i Policisë së Kosovës, Enis Pllana, ka deklaruar se policia ka pranuar informacionin për rastin më 10 korrik dhe ka ndërmarrë veprimet e nevojshme në koordinim me prokurorin e shtetit. Nga ana e saj, Prokuroria Themelore në Prishtinë ka bërë të ditur se prokurori i shtetit është duke ndërmarrë të gjitha veprimet hetimore për zbardhjen e rrethanave të këtij helmimi.
Përditësime
Sipas dëshmive të pacientëve, simptomat e helmimit janë shfaqur që nga e premtja. Klinika Infektive konfirmoi se rastet fillimisht u raportuan përmes rrjeteve sociale. Laura Kryeziu, një nga qytetaret e prekura, deklaroi se gjendja e saj shëndetësore u përkeqësua pas konsumimit të ushqimit në kryeqytet.