Institucionet shëndetësore dhe ato komunale në Han të Elezit janë vënë në lëvizje pas paraqitjes së një numri të konsiderueshëm të qytetarëve me simptoma të gastroenteritit. Sipas të dhënave zyrtare, nga data 13 deri më 15 korrik, 110 persona kanë marrë ndihmë mjekësore pranë QKMF-së lokale.
Kryetari i komunës, Mehmet Ballazhi, ka bërë të ditur se për menaxhimin e situatës janë administruar rreth 300 terapi venoze, ndërsa institucioni shëndetësor disponon mjete dhe terapi të mjaftueshme për të përballuar fluksin. Për shkak të gjendjes shëndetësore, 5 pacientë janë transferuar për trajtim të specializuar në Spitalin Rajonal të Ferizajt dhe në Qendrën Klinike Universitare të Kosovës (QKUK).
Mostrat e marra nga pacientët janë dërguar për analiza laboratorike në Institutin Kombëtar të Shëndetësisë Publike të Kosovës (IKSHPK). Autoritetet komunale deklaruan se janë në pritje të rezultateve zyrtare, të cilat do të përcaktojnë shkakun e saktë të rasteve.
Kryetari Ballazhi u ka bërë thirrje qytetarëve që të shmangin spekulimet dhe informatat e pakonfirmuara, duke kërkuar besim te institucionet përgjegjëse. Gjithashtu, ai u ka rikujtuar banorëve nevojën për respektim të masave të higjienës, sidomos gjatë ditëve me temperatura të larta, dhe ka kërkuar paraqitje të menjëhershme për ndihmë mjekësore nëse shfaqen simptoma.