Gjatë javëve të fundit, në Prishtinë është vërejtur një shtim i rasteve me infeksione gastrointestinale, të njohura në mjekësi si gastroenterite akute. Pacientët që kërkojnë ndihmë mjekësore shfaqin simptoma si vjellje, barkqitje, temperaturë dhe dhimbje barku.
Doktoresha Endrita Tori-Arifi, specializante e mjekësisë familjare, sqaroi se kjo rritje është e lidhur me periudhën e verës. Sipas saj, infeksioni po prek grupmosha të ndryshme të popullatës. Mjekja vuri theksin te domosdoshmëria e kujdesit ndaj grupeve më të ndjeshme si fëmijët, të moshuarit dhe personat me sëmundje kronike, për të parandaluar ndërlikimet nga dehidrimi.
Në lidhje me situatën, Klinika Infektive nuk ka ofruar përgjigje gjatë ditës së sotme nëse ka pacientë të shtruar për trajtim pas infektimit me këtë virus. Stafi mjekësor rekomandon konsumimin e mjaftueshëm të lëngjeve si masë parandaluese dhe kujdes të shtuar higjienik gjatë kësaj periudhe.