Kreu i SPAK, Klodian Braho, gjatë raportimit në Komisionin e Ligjeve, është përballur me pyetje të deputetëve lidhur me ecurinë e hetimeve për vrasjen e katër protestuesve në ngjarjet e 21 janarit 2011.
Deputeti socialist Pacaj ngriti shqetësimin për vonesat në zbardhjen e kësaj ngjarjeje, duke kërkuar garanci për vendosjen e drejtësisë për familjarët e viktimave, përfshirë atë të Aleks Nikës. Ai shprehu rezerva ndaj prokurorit të çështjes, duke pretenduar ekzistencën e një konflikti interesi.
Nga ana tjetër, deputeti demokrat Gent Strazimiri kërkoi të dijë nëse ekziston mundësia që të merret si dëshmitar ish-ambasadori amerikan në Tiranë, Alexander Arvizu. Strazimiri iu referua një interviste të diplomatit të vitit 2013, ku ai fliste mbi dinamikën e ngjarjeve dhe rolin e ambasadës.
Në përgjigje të këtyre kërkesave, Klodian Braho theksoi se çështja është në hetim dhe se organi i akuzës nuk mund të japë komente mbi detajet konkrete gjatë zhvillimit të procedurave. Lidhur me mundësinë e dëshmisë së ish-ambasadorit, Braho sqaroi se prokurori i çështjes ka autoritetin e plotë për të ndërmarrë veprime hetimore, si brenda ashtu edhe jashtë vendit, në përputhje me nevojat e hetimit.