Mark Nikaj, xhaxhai i Aleks Nikajt, një nga viktimat e ngjarjeve të 21 Janarit 2011, foli në një lidhje direkte me emisionin “Off the Record” në A2CNN, të moderuar nga Andrea Danglli.
Ai deklaroi se të afërmit e viktimave kanë kërkuar që Prokuroria e Posaçme Kundër Korrupsionit dhe Krimit të Organizuar (SPAK) të marrë në pyetje kryeministrin Edi Rama dhe persona të tjerë për ngjarjet e asaj dite. “Janë 15 vjet që ne vuajmë dhe lotët nuk na kanë pushuar për një drejtësi të munguar”, tha Nikaj, duke shtuar se shpresa e fundit për drejtësi varet nga hetuesit e SPAK-ut.
Sipas tij, SPAK-u po kryen hetime të plota për të identifikuar autorët dhe urdhëruesit e vrasjeve. Nikaj ka kërkuar statusin e hetimit, duke vënë në dukje një zvarritje të pakuptimtë. Ai pretendon se dosja është masakruar nga Prokuroria e Tiranës dhe Gjykata e Lartë, të cilat kanë larguar dokumente që mund të çonin në përfundim më të shpejtë.
Nikaj deklaroi se është përgatitur një memo për pyetjen e personave të tjerë, përfshirë anëtarë të Gardës, Shërbimeve Civile dhe policisë të pranishëm atë ditë. Ai akuzoi Partinë Demokratike se synonte ruajtjen e pushtetit me dhunë dhe vrasje, duke cituar ish-kryeministrin që pretendonte se ligji lejonte vrasjen e demonstruesve. “Si mundet të thuhet se është vrasje legjitime vrasja e nipit tim 100 metra larg Kryeministrisë?” pyeti ai.
Të afërmit kanë dorëzuar në SPAK një kasetë ku identifikohen urdhërdhënësit dhe personat që kanë marrë urdhër për të qëlluar. Nikaj theksoi se ky krim makabër është i filmuar nga media dhe i transmetuar live.