Mark Nika, xhaxhai i Aleks Nikës, një prej viktimave të ngjarjes së 21 Janarit 2011, u takua të martën me kreun e Prokurorisë së Posaçme Kundër Korrupsionit dhe Krimit të Organizuar (SPAK), Klodian Braho. Takimi u kërkua nga vetë Nika, i cili pas daljes nga SPAK zbuloi detaje nga biseda.
Nika deklaroi se Braho i tha se hetimi po zhvillohet me intensitet maksimal, edhe pse familjarëve u duket i zvarritur. Midis problemeve përmendi mungesën e pyetjeve për shumë persona të rëndësishëm dhe faktin se kaseta ende nuk është dërguar për ekspertim. "Ne e dimë se kush janë vrasësit, por puna është ta zbardhë drejtësia", shtoi ai.
Më 21 janar 2011, në protestën e organizuar nga opozita, mbetën të vrarë katër persona me armë zjarri: Aleks Nika, Ziver Veizi, Hekuran Deda dhe Faik Myrtaj. Për ngjarjen u dënuan me një vit burgim ish-kreu i Gardës, Ndrea Prendi, dhe me tre vjet burgim gardisti Agim Llupo. Vrasjet e Aleks Nikës dhe Hekuran Dedës mbetën pa autorë të identifikuar.
Në 2020, Prokuroria e Tiranës pezulloi hetimet për mungesë autorësh, por i rihapi në 2021 dhe i vazhdoi. Në 2024, Gjykata e Lartë urdhëroi SPAK-un të regjistronte kallëzimin penal të familjes Nika, pasi kishte refuzuar ta bënte menjëherë pas vendimit të Gjykatës Evropiane për të Drejtat e Njeriut në Strasburg më 14 janar, që e cilësoi ngjarjen si krim shtetëror.