Një investigim i publikuar nga tabloidi britanik The Sun ka nxjerrë në pah një metodë të re të kontrabandës së emigrantëve dhe personave me precedentë penalë drejt Mbretërisë së Bashkuar. Përmes përdorimit të jahteve luksoze, rrjetet kriminale shmangin kontrollet e rrepta në portet kryesore, duke u ankoruar në marina më të vogla.
Gazetarët e tabloidit arritën të lidheshin me trafikantët përmes një reklame në platformën TikTok, duke u paraqitur si shtetas shqiptarë të dëbuar më parë nga burgu Wandsworth në Londër. Në bisedat e zhvilluara në aplikacionin WhatsApp, anëtarët e rrjetit kërkuan një pagesë prej 15,500 paund për transportin, i cili do të nisej nga Holanda me destinacion zonën pranë Doverit. Trafikantët insistuan që pagesa të kryhej në Shqipëri përpara nisjes.
Njëri nga trafikantët, i cili gjithashtu pohoi se ishte dëbuar pasi kishte vuajtur dënimin në burgun e Doncaster për shitje kokaine, shpjegoi se jahti kishte tri kabina luksoze dhe transportonte grupe të kufizuara prej jo më shumë se dhjetë pasagjerësh. Sipas raportimit, një jaht i përdorur për këto aktivitete është marrë me qira për shifrën e 50,000 eurove.
Ky fenomen është pjesë e një trendi më të gjerë të rikthimit të personave të dëbuar në territorin britanik. Statistikat e cituara nga The Sun tregojnë se në pesë vitet e fundit, 4,614 persona janë rikthyer në Britani pasi ishin dëbuar më parë, ku më shumë se një e treta e tyre janë shtetas shqiptarë. Autoritetet britanike kanë goditur më herët raste të ngjashme, duke përfshirë arrestime në muajt mars dhe maj, ku janë kapur jahte me emigrantë në brigjet jugore të Anglisë.