Dënohen dy shqiptarë dhe një rumun për trafikimin e emigrantëve me kamionë drejt Anglisë

Autoritetet britanike kanë çmontuar një rrjet kriminal me bazë në Londër, i cili përdorte kamionë për të transportuar emigrantë shqiptarë që hynin ilegalisht në Mbretërinë e Bashkuar. Tre anëtarët kryesorë, Toni Liko (42 vjeç), Klement Gjika (44 vjeç) dhe Stelian Bodnariu (37 vjeç), u dënuan në Gjykatën e Kurorës në Southwark më 27 mars 2026.

Liko dhe Gjika morën nga 5 vite e 8 muaj burg secili, ndërsa Bodnariu 3 vite e 4 muaj. Gjykata i shpalli fajtorë për konspiracion në lehtësimin e shkeljes së ligjit të imigracionit pas një procesi gjyqësor që zgjau shtatë javë, i nisur më 8 dhjetor 2025 dhe përfunduar me verdiktin e fajësisë më 12 shkurt 2026.

Hetuesit e Policisë Metropolitane zbuluan se rrjeti kishte vepruar për 18 muaj, duke transportuar të paktën 20 shtetas shqiptarë në Londër. Dyshohet se numri real është më i lartë. Ata kërkonin 11 mijë paund për çdo person të trafikuar dhe përdornin stacione karburanti në autostradën M25 për transferime nga një automjet në tjetrin.

Për të identifikuar grupin, policia ndoqi lëvizjet e automjeteve, analizoi pamjet nga kamerat e sigurisë dhe përdori metoda mbikëqyrjeje. Treshja u arrestua më 18 qershor 2025. Kontrolli i telefonave nxori mesazhe që tregonin koordinimin mes organizatorëve dhe shoferëve të kamionëve për pikët e takimit dhe transportin.

Inspektori Stuart Jack, që drejtoi hetimin, theksoi se qëllimi i grupit ishte përfitimi financiar. Ai paralajmëroi se emigrantët e trafikuar shpesh shfrytëzohen më tej në Britani, duke u detyruar të punojnë për rrjete kriminale. “Apeloj te shoferët e kamionëve të jenë vigjilentë dhe të njoftojnë çdo aktivitet të dyshimtë. Kjo nuk është krim pa viktima”, deklaroi ai.