Skënder Hita, drejtor i Përgjithshëm i Policisë së Shtetit dhe Drejtues Madhor, zhvilloi takim pune me Ami Kozeli, drejtor i Përgjithshëm i Autoritetit Rrugor Shqiptar (ARRSH), në Drejtorinë e Përgjithshme të Policisë së Shtetit më 10 prill 2026.
Në takim morën pjesë grupet e përbashkëta të punës. Drejtuesit theksuan rëndësinë e operacionit mbarëkombëtar për lirimin e hapësirave të zëna në mënyrë të paligjshme në anë të akseve rrugore kombëtare dhe krijimin e korridoreve të gjelbra. Aksioni do të nisë javën e ardhshme.
Hita theksoi se Policia e Shtetit është e angazhuar plotësisht për përmbushjen e kësaj detyre. Ai kërkoi nga Departamenti i Sigurisë të mbështesë ARRSH-në në terren dhe të vazhdojë me ndëshkimin e përgjegjësve me masa administrative dhe penale.
Kozeli falënderoi Policinë për mbështetjen dhe bëri të ditur se ARRSH ka nisur evidentimin dhe heqjen e ndërtimeve, objekteve, tabelave reklame, depozitimeve materiale dhe përdorimeve të tjera të palejuara brenda kufirit rrugor, zonës rrugore, brezit të rezervuar dhe hapësirave për fushëpamje e siguri rrugore. Këto masa bazohen në inventarin e miratuar me VKM nr. 234, datë 17.04.2024.
Drejtoritë Rajonale të ARRSH-së kanë filluar njoftimin e bizneseve për të liruar hapësirat e zëna në mënyrë të paligjshme dhe për të ndaluar përdorimin e tyre të paautorizuar në segmentet rrugore kombëtare.