Skënder Hita, Drejtor i Përgjithshëm i Policisë së Shtetit, i shoqëruar nga Drejtori i Departamentit për Rendin dhe Sigurinë Publike, si dhe Drejtori i Policisë Rrugore, vizitoi më 9 maj Qendrën Kombëtare të Monitorimit të Trafikut.
Hita u prit nga Ami Kozeli, Drejtor i Përgjithshëm i Autoritetit Rrugor Shqiptar (ARRSH), dhe drejtuesit e qendrës. Qëllimi i vizitës ishte gjetja e mënyrave për t’i vënë në dispozicion Policisë së Shtetit pamjet nga kamerat, radarët funksionalë dhe pajisjet që do të vendosen.
Këto pamje do të shërbejnë për Policinë Rrugore në evidentimin dhe ndëshkimin e shkeljeve të rregullave të qarkullimit rrugor. Gjithashtu, do të përdoren nga struktura të tjera policore për rritjen e sigurisë publike, parandalimin e ngjarjeve kriminale dhe dokumentimin ligjor të tyre.
Gjatë takimit, Hita theksoi se përdorimi i mjeteve bashkëkohore logjistike dhe teknologjisë inteligjente, duke minimizuar kontaktin e drejtpërdrejtë të punonjësve policorë me përdoruesit e rrugës, do të rrisë parametrat e sigurisë rrugore dhe do të forcojë imazhin e vendit, si dhe të Policisë së Shtetit.
Kozeli vlerësoi bashkëpunimin institucional dhe nënvizoi se koordinimi ndërmjet institucioneve do të ndikojë në rritjen e sigurisë në akset rrugore dhe përmirësimin e standardeve të monitorimit të trafikut.
Në përfundim, Hita dhe Kozeli u dakordësuan për finalizimin e bashkëpunimit në përftimin e pamjeve, si dhe për kalibrimin e radarëve në akset rrugore dhe tunele. Kështu, pamjet dhe të dhënat do t’i vihen në dispozicion Policisë së Shtetit për verifikimin dhe ndëshkimin e shkeljeve me masa administrative.