Drejtori i Përgjithshëm i Policisë së Shtetit, Skënder Hita, ka shpërndarë një telegram në të gjitha drejtoritë vendore dhe komisariatet e policisë në vend. Në dokument kërkohen masa të menjëhershme për të goditur shpërndarjen e lëndëve narkotike dhe mbajtjen e armëve të ftohta në shkolla dhe në perimetrin e tyre të sigurisë.
Hita ngre shqetësimin për disa ngjarje të rënda të regjistruara gjatë vitit shkollor 2024-2025, ku nxënës ose persona të tjerë kanë hyrë në ambiente arsimore me sende të ndaluara. Këto raste kanë rrezikuar jetën dhe sigurinë e nxënësve dhe kanë cënuar zhvillimin normal të procesit mësimor.
Sipas urdhrit, do të organizohen shërbime të posaçme policore pranë çdo institucioni arsimor. Do të vendosen agjentë të policisë kriminale për të monitoruar situatën dhe për të goditur shpërndarësit e drogës. Parashikohen gjithashtu kontrolle të befasishme nga strukturat e narkotikëve, agjentët e komisariateve dhe forcat operacionale.
Strukturat e Hetimit Ekonomik dhe Financiar, në bashkëpunim me komisariatet, janë urdhëruar të ndalojnë shitjen e produkteve të ndaluara për të miturit nën 18 vjeç. Hita ka pranuar dobësi në punën e strukturave policore dhe ka paralajëruar masa disiplinore ndaj atyre që nuk zbatojnë detyrat.
Përditësime
Hita ka urdhëruar kontrolle blic pranë shkollave kundër drogës dhe armëve të ftohta. Policia e Shtetit do të përdorë metoda speciale hetimi për dokumentimin e rasteve të drogës dhe do të forcojë bashkëpunimin me drejtorët e shkollave. Një agjent policie do të caktohet në çdo institucion arsimor.