Gjatë një takimi me drejtues dhe punonjës të Drejtorisë Vendore të Policisë Fier, Drejtori i Përgjithshëm i Policisë së Shtetit, Skënder Hita, vlerësoi angazhimin dhe profesionalizmin e forcave policore në operacione të ndryshme. Një vlerësim i veçantë iu akordua Mariglen Koroveshaj, të cilit iu dha grada Kryekomisar për rolin e tij në shpëtimin e 24-vjeçares Rozalinda Plaku, e cila ishte marrë peng me 24 korrik në fshatin Vidhishte nga ish-partneri i saj, Refit Buzi, pasi ky i fundit kishte vrarë prindërit e saj, Kosta dhe Belere Plaka. Pas rreth dy orësh negociata, Koroveshaj mundësoi lirimin e vajzës, ndërsa autori më pas vrau veten. Nga dita e sotme, Koroveshaj nis detyrën e re pranë strukturave të DVP Berat.
Krahas kësaj, Hita vlerësoi punën e efektivave, veçanërisht të Forcës së Posaçme "Shqiponja", në kapjen e autorëve të dy ngjarjeve të tjera: vrasjes së një 20-vjeçari portugez në Ksamil dhe vrasjes së një gruaje me plagosjen e bashkëshortit të saj në Lushnjë. Si shenjë vlerësimi për angazhimin në këto operacione, të gjithë efektivët e përfshirë do të shpërblehen me nga një pagë mujore. Hita nënvizoi se këto rezultate janë produkt i punës në grup dhe koordinimit, duke shërbyer si model për të gjithë punonjësit e policisë në mbrojtje të jetës dhe pronës së qytetarëve.