Holanda dhe Finlanda i janë shtuar listës së vendeve evropiane që kanë njoftuar dërgimin e personelit ushtarak në Groenlandë, në një kontekst të tensionuar pas deklaratave të presidentit amerikan Donald Trump për marrjen e kontrollit të këtij ishulli nën sovranitetin danez.
Ministri holandez i Mbrojtjes, Ruben Brekelmans, deklaroi se "siguria në rajonin e Arktikut, përfshirë Groenlandën, ka rëndësi strategjike për të gjitha vendet anëtare të NATO-s". Ai sqaroi se Holanda do të marrë pjesë në një mision të përbashkët zbulimi në Groenlandë, në kuadër të stërvitjes ushtarake në Arktik, duke dërguar një oficer të marinës.
Ndërkohë, Ministria e Mbrojtjes e Finlandës bëri të ditur se do të dërgojë dy oficerë ushtarakë ndërlidhës në Groenlandë, me qëllim shqyrtimin e mundësive për aktivitete të përbashkëta stërvitore.
Këto njoftime vijnë pas vendimeve të ngjashme nga:
- Franca
- Suedia
- Gjermania
- Norvegjia
të cilat kanë paralajmëruar gjithashtu dislokimin e personelit ushtarak në këtë zonë strategjike të Arktikut.