Në sfidën e zhvilluar në Houston, ekipi i Holandës, nën drejtimin e trajnerit Ronald Koeman, dominoi ndeshjen kundër Suedisë. Protagonistët e takimit ishin Brian Brobbey, i cili realizoi në minutat 5-të dhe 17-të, dhe Cody Gakpo, autor i dy golave në minutat 47-të dhe 54-të. Golin e vetëm për suedezët e shënoi Anthony Elanga në minutën e 59-të, ndërsa Crysencio Summerville vulosi fitoren 5-1 me një gol në minutën e 89-të.
Me këtë sukses, Holanda regjistroi 14 ndeshje radhazi pa humbje në Kupën e Botës, duke vendosur një rekord të ri në historinë e turneut. Seria, e cila nisi në Botërorin 2014, përfshin 10 fitore dhe katër barazime. Humbja e fundit e holandezëve në kohën e rregullt ose shtesë mbetet ajo e finales së vitit 2010 përballë Spanjës.
Rekordi i mëparshëm mbahej nga Brazili i Pelesë, që kishte qëndruar 13 ndeshje radhazi pa humbje midis viteve 1958-1966.
Përveç rekordit të përgjithshëm, Holanda arriti kuotën e 18 ndeshjeve radhazi pa humbje në fazën e grupeve, një seri që ka nisur që nga viti 1994. Pas dy ndeshjeve të para, Holanda kryeson Grupin F me katër pikë, ndërsa Suedia renditet e dyta me tre pikë.